ვალუტის კურსი  

ამინდის პროგნოზი  

ლოკალური დრო  

განცხადება  

ძიება  

არქივი  

,,ჩიბურეკი'', ,,შაურმა'', ,,ჰამბურგერი'' და... მისაბაძი თათქარიძეები

,,ჩიბურეკი'', ,,შაურმა'', ,,ჰამბურგერი'' და... მისაბაძი თათქარიძეები

PDFბეჭდვაელფოსტა

ავტორი:ირმა ცეცხლაძე

ბოლო წლებში ქალაქში, თითქმის ყოველ ფეხის ნაბიჯზე გაიხსნა პატარ-პატარა საცხობები და სწრაფი კვების ობიექტები, რომლებიც უხვად გვთავაზობენ სხვადასხვა სახის პროდუქტს. ბათუმელები თანდათან ისე მიეჩვივნენ ამ სერვისს, რომ ბევრი, არათუ სამსახურის თუ სწავლის შუალედებში, სახლში ყოფნის დროსაც კი საუზმედ და ვახშმად (ზოგიერთი სადილადაც კი) ამ ობიექტებიდან აღებულ საკვებს იყენებს. თუ ადრე პატარა ქალაქის მცხოვრებლები ერიდებოდნენ მსგავს ნაწარმს (რის გამოც ეს ბიზნესი აქ ვერ იკიდებდა ფეხს), ახლა აღარავინ დაგიდევს, თუ რა შედეგი მოჰყვება მსგავს კვებას და მშვიდად აფინანსებენ საკუთარ შვილებსაც, სკოლიდან სახლამდე სწორედ ,,ფასთ ფუდით'' რომ დაიოკონ შიმშილი და მათთვის ასე საყვარელი ,,ფენოვანი'' თუ ,,ჰამბურგერი'' მიირთვან. ბავშვებს რა უნდა მოსთხოვო, თავად ასეთი დედებიც და მამებიც (რომლებიც მუშაობენ ან არ მუშაობენ), მშვენივრად ,,გადადიან'' მსგავსი საკვებით. მართალია, მთელი ეს პროცესი ძალიან მოსახერხებელია და თუ დიდი ოჯახი არა გაქვთ, იაფიც, მაგრამ ,,ჩიბურეკი'', ,,ჰოთ-დოგი'', ,,შაურმა'' თუ სხვადასხვა სახის ღვეზელი, ასე რომ გვიზიდავს შიმშილის დროს მკვეთრი არომატით, ჭამის შემდეგ ხომ საგრძნობლად გვამძიმებს? ჩქარ-ჩქარა დავნაყრდებით თუ არა, გული გვიმსუყდება და არასასიამოვნო შეგრძნება გვეუფლება. რამდენჯერ მიგვიცია საკუთარი თავისთვის პირობა, რომ აღარ გავეკარებოდით ,,ფასთ- ფუდებს'', მაგრამ მეორე დღესვე, მოგვშივდება თუ არა, ისევ გავრბივართ უკვე ნაცნობ, დამწვარი ზეთის სუნით გაჟღენთილ მინი-საცხობებში.

ამ საკითხზე მინი პრეს-გამოკითხვა ჩავატარეთ. აღმოჩნდა, რომ გამოკითხულთა ძირითადი ნაწილი ხალისით სარგებლობს ,,ქუჩის კვების'' სერვისით, თუმცა ბევრი მათგანი მოერიდა გაზეთის ფურცლებს და არ გაამხილა ვინაობა. ზოგიერთი კი სიამოვნებით დაგვთანხმდა.

ლეილა კიკალეიშვილი: - ვიცი, რომ არ ვარგა ქუჩაში ნაყიდი ჰამბურგერი, მაგრამ ჩემს ქმარს ვერაფერი გავაგებინე, სკოლაში წასვლის წინ აძლევს ბავშვს ფულს და ჩემს უკმაყოფილებაზე აცხადებს, აბა, რა ქნას ბიჭმა, სხვებს უყუროს და ნერწყვები ყლაპოსო? მოდის ბავშვი სკოლიდან უკვე დანაყრებული და წვნიანებს და სახლში დამზადებულ გემრიელ კერძებს პირს აღარ აკარებს.

თენგო ნადიბაიძე: - სამარშრუტო ტაქსის მძღოლი ვარ და თითქმის ყოველდღე გარეთ ვიკვებები. სახლში წასვლას ვერც ვასწრებ. უკვე ვამჩნევ, რომ კუჭი აღარ მაქვს წესრიგში, მაგრამ სხვა გამოსავალი სად ვნახო. თან ეს საკვები იაფი და ხელმისაწვდომია ჩემთვის და ჩემი პროფესიის ხალხისთვის.

ლალი ბაქრაძე:
- სულაც არ მიმაჩნია, რომ ფენოვანი ან ღვეზელი, რომელსაც აგერ, კუთხეში აცხობენ, მაწყენს. ჩემი გოგო და მე თითქმის ყოველდღე იმ საცხობს ვაკითხავთ, ხან ნამცხვრები მოგვაქვს, ხან ხაჭაპური ან ღვეზლები. მშვენივრად გავდივართ ამ საკვებით და იმაშიც დარწმუნებული ვართ, რომ იქ დაცულია სანიტარიული პირობები. თან ჩვენი მეზობლები მუშაობენ, ცუდს ხომ არ მოგვყიდიან?

კარგა ხანია ცნობილია, რომ მსოფლიოს მრავალი ქვეყნის ექიმები კრძალავენ ,,ქუჩის პროდუქტების'' რეგულარულად მოხმარებას, რადგან ზიანს აყენებს ადამიანის ორგანიზმს. ცხადია, ცხოვრების თანამედროვე რიტმიდან გამომდინარე, ძნელია მსგავსი პროდუქტის დამზადების აკრძალვა, მაგრამ მისი ძირითად საკვებად დანერგვა ნიშნავს გაწიროთ თავი ჯანმრთელობის სერიოზული პრობლემებისათვის.

სპეციალისტების აზრით, ,,ქუჩის პროდუქტებს'' თვეში ერთხელ ან ორჯერ თუ დააგემოვნებთ, ეს დიდ სირთულეებს არ შეგიქმნით, თუმცა მოწამვლა ერთ ჯერზეც შესაძლებელია. არც ისაა ჩვენთვის უცხო ინფორმაცია, რომ მსგავსი პროდუქტების ხშირი მოხმარება იწვევს წონის მატებას, ვინაიდან ამ ტიპის საკვებით ადამიანის ორგანიზმი ჭარბად იღებს რაფინირებულ ნახშირწყლებს (აღნიშნულ საკვებში ცომეულის და შაქრების ჭარბად არსებობის გამო) და ცხიმებს. ეს პროდუქტები ძალიან ღარიბია მინერალებით, ვიტამინებით და სხვა სასარგებლო ნივთიერებებით.

ისიც გაითვალისწინეთ - სწრაფი კვების პროდუქტებს მივირთმევთ ფეხზე, სიჩქარეში, მოკლე შესვენების დროს. ამის გამო, ლუკმების დაღეჭვას წესიერად ვერ ვახერხებთ და საკვები კუჭში ხვდება დაუღეჭავად, დიდი ნაჭრების სახით. კუჭის ასეთ არასწორ მუშაობას კი, ექიმების აზრით, მივყავართ ისეთ სერიოზულ დაავადებებამდე, როგორიცაა პანკრეატიტი, გასტრიტი, კუჭისა და თორმეტგოჯა ნაწლავის წყლული.

მედიკოსები ასევე თვლიან, რომ განსაკუთრებულ ზიანს გვაყენებს ის მავნე ნივთიერებები, რომლებითაც ,,მდიდარია'' ეს პროდუქტები, განსაკუთრებით კი ცხიმები და მარგარინი, რომელსაც მათი მომზადებისას იყენებენ.

არავისთვის აღარ წარმოადგენს საიდუმლოს ის ფაქტიც, რომ სწრაფი კვების ობიექტებში მხოლოდ ორ-სამ დღეში ერთხელ (ან უფრო იშვიათად) ცვლიან ზეთს, რომელშიც წვავენ სხვადასხვა პროდუქტს (ღვეზელს, ფუნთუშას და ა. შ.). დიდი პერიოდის განმავლობაში ბევრჯერ გაცხელებულ ზეთში წარმოიქმნება არა მხოლოდ ტოქსიკური, არამედ კანცეროგენული თვისებების მქონე ნივთიერებები (აკრილამიდი, ჰეტეროციკლური ამინები, პეროქსიდები), რომლებიც საკმაოდ ბევრი დაავადების მიზეზი ხდება. როგორც ექსპერტები აღნიშნავენ, ეს სნეულებებია: ქოლესტერინის დონის მომატება, გულ-სისხლძარღვთა და კუჭ-ნაწლავის ტრაქტის, გულის იშემიური დაავადებები, ონკოლოგიური, ნერვული სისტემის პრობლემები, უშვილობა, დიაბეტი. ეს მავნე ნივთიერებები ზეთიდან გადადის პროდუქტში. ბუნებრივია, ასეთი საკვები დაანგრევს ჯანმრთელობას.

სპეციალისტების მტკიცებით, ,,ქუჩის პროდუქტების'' კიდევ ერთი პრობლემაა მარგარინი, რომელიც გამოიყენება საკმაოდ ფართო ასორტიმენტის (ფენოვანი ხაჭაპურების, ლობიანების, ნამცხვრების და სხვ.) მოსამზადებლად. სამწუხაროდ, მათში დებენ ძალზე იაფიან მარგარინს, რომელშიც მაღალია ადამიანისთვის საკმაოდ მავნე ნივთიერების ე. წ. ტრანსცხიმების შემცველობა, რომელიც ხელს უშლის საკვების ნორმალურ მონელებას და შეთვისებას, პარალელურად კი ავითარებს რიგ პათოლოგიას.

როგორც აღმოჩნდა, 2003 წლიდან ევროკავშირში მკაცრად აკონტროლებენ პროდუქტში ტრანსცხიმების შემცველობას. კერძოდ, იგი არ უნდა აღემატებოდეს არსებული ცხიმის 237,-ს. სამწუხაროდ, ჩვენთან ეს საკითხი არც კი განიხილება, არათუ კონტროლდება და თავისუფლად იყიდება ამ ცხიმებით გაჯერებული (4037,-მდე აღწევს) მარგარინი. იგი დაბალი ხარისხის გამო იაფია და საცხობებში ფართოდ გამოიყენება.

...და თუ მაინც გიწევთ ,,ქუჩის პროდუქტების'' მოხმარება, გაითვალისწინეთ - არ იკვებოთ მაღალცხიმიანი პროდუქტებით. ზეთში შემწვარს ამჯობინეთ ღუმელში გამომცხვარი ღვეზელი, ფენოვანს - იმერული ხაჭაპური. ყურადღება მიაქციეთ კვების ობიექტების სანიტარიულ მდგომარეობას. დარწმუნდით, რომ საკვებს შესაბამის პირობებში ამზადებენ და ინახავენ; ხშირად არცთუ ისე კარგი ხარისხის დასაფარავად, ,,ქუჩის საკვები'' უხვადაა გაჯერებული სანელებლებით, მაიონეზით, ,,კეტჩუბითა'' და სხვა განსხვავებული სოუსებით. მსგავსი ,,სიმბიოზის'' გასინჯვისგან, სპეციალისტთა რჩევით, უმჯობესია თავი შეიკავოთ. იმას, რომ ნებისმიერი საკვები კარგად უნდა დაღეჭოთ, ოდნავ მაინც რომ შეუმსუბუქოთ მდგომარეობა საკუთარ საჭმლის მომნელებელ სისტემას, ვფიქრობ, ჯერ კიდევ სკოლაში გაცნობებდნენ.

დრომ მოიტანა და, სწრაფი კვების ობიექტების ბიზნესი, ცხადია, კიდევ უფრო გაძლიერდება. განსაკუთრებით, ეს მოსალოდნელია ისეთ განვითარებად ქვეყანაში, როგორიც საქართველოა, სადაც ჯერ კიდევ სიხარულით ხვდებიან ტექნოლოგიურ სიურპრიზებს და ითვისებენ ცივილიზაციის მიერ მოტანილ ბევრ კარგ და ბევრ ცუდ ჩვევას. აშშ-ში რამდენიმე ათწლეულია, რაც ებრძვიან სწორედ მსგავსი ობიექტების არსებობით შექმნილ უზარმაზარ პრობლემებს, მათი მოქალაქეების უსაშველო წონასა და დაზიანებულ ჯანმრთელობაში რომ გამოიხატება. კარგად ვიცით, რამდენ ჩვენს თანამემამულეს ,,შეუსხამს ხორცი'' ამ ქვეყანაში ემიგრაციის პერიოდში, რამდენს დაუზიანდა ორგანიზმი არასასურველი პროდუქტების უზომოდ მიღების გამო. თუ ასეთი ტემპებით გაგრძელდა ჩვენში მსგავსი ობიექტების აღზევება (კლიენტურის სიმრავლე რომ განაპირობებს), რაღა გვინდა ამერიკაში, აქაც მშვენივრად დავსივდებით და საკუთარ შვილებსაც გადავაჯიშებთ, თანაც ისე, თათქარიძეები მისაბაძ ქართველებად მოგვეჩვენება.